Giuseppe Rossi, fyrrum leikmaður Manchester United, æfir nú með félaginu en hann reynir að finna sér nýtt lið.

Rossi er 31 árs gamall í dag en hann var áður á mála hjá United þar sem hann fékk þó lítið að spila.

Ole Gunnar Solskjær þjálfar lið United í dag en hann lék einmitt með Rossi hjá félaginu undir stjórn Sir Alex Ferguson.

Ferguson var mættur á æfingasvæði United á laugardag og sá þar Rossi og var hrifinn af því sem hann varð vitni af.

,,Við munum ekki semja við Giuseppe held ég en hann hefur æft vel með okkur,“ sagði Solskjær um málið.

,,Hann lítur út fyrir að vera í góðu standi og leitar sér að félagi. Hann verður örugglega með okkur í viku í viðbót nema annað félag taki við honum.“

,,Hann skoraði stórkostlegt mark á æfingu á laugaraginn og stjórinn [Ferguson] sneri ser við og sagði: ,,Hvað með þetta mark, maður?“.

,,Þetta snýst aðeins um að við séum að hjálpa honum að koma sér í stand fyrir næsta skref svo ef það eru lið sem hafa áhuga þurfa þau að flýta sér!“