Hólmar Örn Eyjólfsson segist vera reiðubúinn að spila áfram í hægri bakverði þrátt fyrir að vera miðvörður að upplagi. Hólmar spilaði í bakverðinum í síðasta undirbúningsleiknum fyrir HM og var nokkuð sáttur við frammistöðu sína.

„Þetta er náttúrulega allt öðruvísi staða en hafsentinn; meiri hlaup, öðruvísi návígi og meiri svæði milli manna. Mér fannst það bara takast ágætlega. Það þyrfti að skerpa á ýmsu eins og staðsetningum ef maður ætlar að spila þarna meira, en þetta var bara fínt,“ segir Hólmar.

Aðspurður hvort hann gæti hugsað sér að spila áfram sem hægri bakvörður sagðist Hólmar meira en reiðubúinn til þess ef kallið kemur. „Maður tekur því sem manni er gefið og þeir vilja að ég spili í hægri bakverði þá er það bara frábært. Ég fer þá bara inn og geri mitt besta.“

Hólmar segist jákvæður á að fá tækifæri á mótinu þó samkeppnin um stöður sé hörð. „Maður er nú alltaf jákvæður en eins og ég hef sagt áður þá eru ellefu sem byrja inn á og þrír sem koma inn á. Við komum hérna út sem lið og munum standa saman,“ sagði Hólmar og bætti við að þeir sem fengju ekki að spila myndu gera allt sem þeir gætu til að styðja hina sem spila.