Það var í ágúst á síðasta ári sem lífvana maður fannst sitjandi í uppblásnum kajak, sem var á reki undan Glænø við Skælskør í Danmörku.
Nú er búið að jarðsetja hann í gröf hinna óþekktu því ekki er vitað hver hann var. Berlingske skýrir frá þessu.
Lögreglan hefur leitað að ættingjum mannsins bæði í Danmörku og utanlands en án árangurs. Það kom því að þeirri stund að maðurinn væri jarðsettur í gröf hinna óþekktu.
Talsmaður lögreglunnar sagði í samtali við Berlingske að það sé mjög sjaldgæft að enginn sakni fólks en það sé tilfellið í þessu máli. Þetta sé eitt dularfyllsta málið sem lögreglan hafi fengist við.
Það var siglingamaður sem kom auka á manninn sitjandi í kajaknum og náði að draga hann að landi. Líkami hans var enn heitur en þegar viðbragðsaðilar komu á vettvang var maðurinn úrskurðaður látinn.
Það lá fljótlega ljóst fyrir að ekkert saknæmt hafði átt sér stað en spurningin sem brann á lögreglunni var hver maður væri.
Hann var ekki með nein skilríki á sér eða önnur persónuleg skjöl og hann var heldur ekki með síma á sér.
Lögreglan leitaði ítrekað til almennings um upplýsingar og birti nákvæmar lýsingar á manninum og eigum hans, meðal annars á gullhring, sérstöku hálsmeni og Seiko úri. Einnig birti hún mynd af kajak eins og maðurinn fannst í. Hann er af þýskri gerð sem er ekki seld í Danmörku. En þetta skilaði engum árangri frekar en aðrar aðgerðir lögreglunnar.
Einnig var leitað til alþjóðalögreglunnar Interpol og DNA úr manninum var borið saman við alþjóðlega gagnagrunna sem og myndir af tönnum mannsins.
