Rogers var sakfelldur fyrir morð á tveimur konum og var þar að auki undir sterkum grun um að hafa framið þrjú morð til viðbótar. Sjálfur sagðist hann hafa myrt um 70 manns en lögregla hefur dregið þær fullyrðingar í efa.
Í heimildarmynd árið 2012, My Brother the Serial Killer, kom fram að hann hefði verið sá sem myrti Nicole og Ron árið 1994, en eins og frægt er var leikarinn og ruðningskappinn OJ Simpson ákærður fyrir morðið en síðar sýknaður.
Hélt Rogers því fram að Simpson hefði ráðið hann til að stela skartgripum af Nicole og Ron, en ránið hafi farið úrskeiðis og endað með dauða þeirra tveggja. Lögregla skoðaði málið og taldi ekkert hæft í fullyrðingum Rogers.
Allt stefnir í að Rogers verði tekinn af lífi í kvöld og mun það gerast nema eitthvað óvænt komi upp, að því er segir í frétt AP.
Hann var sakfelldur fyrir morð á Tinu Marie Cribbs, 34 ára tveggja barna móður, í Flórída árið 1995. Þau höfðu hist á bar fyrr um kvöldið. Þá var hann sakfelldur fyrir morð á Söndru Gallagher, þriggja barna móður, sem hann hitti á bar í Van Nuys í Kaliforníu en morðið framdi hann nokkrum vikum fyrir morðið á Cribbs.
Lögmenn hans hafa reynt hvað þeir geta að fá aftökunni frestað eða dómnum breytt í lífstíðarfangelsi en án árangurs. Hafa þeir meðal annars bent á að Rogers hafði mátt þola svívirðilegt kynferðislegt ofbeldi þegar hann var barn.
