Málið kom upp í febrúarmánuði þegar slökkvilið var kallað að heimili í Waterbury vegna elds sem komið hafði upp. Þegar viðbragðsaðilar komu á vettvang mætti þeim 32 ára karlmaður sem var illa á sig kominn.
Sagðist hann hafa kveikt eldinn því honum hefði verið haldið föngnum á umræddu heimili áratugum saman og hann vildi sleppa úr haldi.
Maðurinn var með skemmdar tennur, hárið í flækju og það sem vakti einna mesta athygli var að maðurinn var aðeins rúm 30 kíló.
Lýsti maðurinn því að stjúpmóðir hans, fyrrnefnd Kimberly, hefði læst hann inni í herbergi þegar hann var 11 ára og hann hafi aðeins fengið að fara út úr herberginu í stutta stund á hverjum degi til að sinna húsverkum.
Í fréttum bandarískra fjölmiðla af málinu kemur fram að maðurinn hafi sagt við lögreglu að hann hafi fengið að fara oftar út úr herberginu á meðan faðir hans var á lífi. Hann hafi til dæmis fengið að vinna í garðinum fyrir utan húsið. Hann muni ekki eftir því að hafa yfirgefið húsið síðan hann var 14 eða 15 ára.
Maðurinn sagði einnig við lögreglu að hann hefði einungis fengið tvær samlokur og tvö vatnsglös á hverjum degi. Þá hefði hann þurft að gera þarfir sínar í flöskur eða á dagblöð sem hann gat losað sig við þegar hann fór út úr herberginu til að sinna húsverkum.
Kimberly er sögð neita sök en hún á yfir höfði sér fjölda ákæra vegna málsins.
