„Íbúum Belcastro er skipað að forðast að veikjast á nokkurn þann hátt sem kallar á læknisaðstoð,“ skrifaði hann í tilkynningunni sem hann segir sjálfur vera „augljóst grín“. En að baki gríninu liggur ákveðin alvara.
BBC segir að bæjarstjórinn hafi beðið bæjarbúa um að „forðast að taka þátt í því sem getur valdið líkamstjóni og forðast slys heima við“.
Hann ráðleggur íbúunum einnig að „fara ekki oft að heiman, ferðast eða stunda íþróttir“, þess í stað eigi þeir „að hvíla sig megnið af tímanum“.
Í samtali við BBC sagði hann að ástæðan fyrir þessu gríni hans sé hversu lélegt heilbrigðiskerfið í héraðinu er. Næsta bráðamóttaka er í um 45 km fjarlægð og þangað er aðeins hægt að aka eftir vegi þar sem leyfður hámarkshraði er 30 km/klst. Þess utan er læknavaktin bara opin öðru hvoru.
„Það er erfitt að finnast maður öruggur, þegar maður veit að ef maður þarf aðstoð, þá er bara hægt að fá hana með því að komast tímanlega á bráðamóttökuna. Þessi langa leið þangað er næstum hættulegri en sjúkdómurinn,“ sagði hann í samtali við ítalska sjónvarpsstöð að sögn BBC.
Vandamálin, sem hann benti á, er eitthvað sem mjög margir íbúar í suðurhluta Ítalíu kannast við. Þar skortir lækna og annað heilbrigðisstarfsfólk og biðlistarnir eru fáránlega langir. Mjög mikið er af eldri borgurum í landshlutanum og því meira álag á heilbrigðiskerfið en ella.
Þetta á við í Belcastro en um helmingur íbúanna 1.200 eru eldri en 65 ára að sögn bæjarstjórans.
Það eru að sögn aðallega tvær ástæður fyrir því hversu slæm staða heilbrigðiskerfisins er í þessum landshluta. Önnur er að stjórnun þess er ábótavant, bæði svæðisbundin stjórnun og á landsvísu. Hin er starfsemi skipulagðra glæpasamtaka en samfélagið er gegnsýrt af áhrifum hennar. Segja má að hvar sem von er um peninga, þar er mafían.
