Hópur barna hefur verið handtekinn í Bretlandi vegna gruns um að hafa orðið áttræðum karlmanni, sem var úti að ganga með hundinn sinn, að bana.
Málið kom upp í bænum Braunstone Town sem er í næsta nágrenni við borgina Leicester en í bænum búa um 17.000 manns.
Ráðist var á gamla manninn í almenningsgarði á sunnudagskvöld en hann lést á sjúkrahúsi um sólarhring síðar.
Börnin sem hafa verið handtekin eru alls fimm. Í hópnum eru drengur og stúlka sem eru bæði 14 ára og tvær stúlkur og einn drengur sem eru öll 12 ára.
Árásin átti sér stað við innganginn inn í garðinn en börnin eru sögð hafa flúið af vettvangi áður en viðbragðsaðilar komu á staðinn.
Dóttir mannsins tjáði fjölmiðlum áður en hann lést að faðir hennar hefði orðið fyrir mænuskaða og ætti að gangast undir aðgerð. Hún sagði að faðir hennar hefði verið örstutt frá heimili þeirra þegar ráðist var á hann. Hún heyrði læti og hljóp út og fann föður sinn liggjandi á jörðinni en hann kvartaði undan verkjum í hálsi og sagðist ekki geta hreyft fæturna.
Lögreglan á svæðinu óskar eftir því að þau sem kunni að búa yfir upplýsingum um málið hafi samband. Rannsókn er í fullum gangi og rætt hefur verið við íbúa í nágrenninu en lögreglan er að reyna að varpa ljósi á atburðarásina. Einnig hefur lögreglan aukið viðveru sína á svæðinu.
Sömuleiðis hefur lögreglan tilkynnt sjálfa sig til stofnunar sem hefur eftirlit með störfum lögreglu vegna fyrri samskipta lögreglumanna við manninn sem lést. Í hverju þessi samskipti fólust kemur hins vegar ekki fram.
