Fjórir Suður-Afríkumenn, sem voru blekktir til að berjast með Rússum í Úkraínu, sneru nýlega heim.  Þeir voru í 17 manna hópi sem sendi neyðarkall til suðurafrísku ríkisstjórnarinnar í nóvember.

SABC skýrir frá þessu og segir að lögreglan hafi tekið á móti mönnunum þegar þeir lentu í Jóhannesborg. Samkvæmt suðurafrískum lögum er ríkisborgunum bannað að veita erlendum ríkjum hernaðaraðstoð.

Eftir að neyðarkall barst frá hópnum í nóvember ræddi Cyril Ramaphosa, forseti, málið við Vladímír Pútín, Rússlandsforseta. Eftir fundinn sagði suðurafríska forsetaembættið að forsetarnir hefðu heitið að styðja aðgerðir til að koma mönnunum heim til Suður-Afríku.

Suður-Afríka hefur reynt að taka sér stöðu sem hlutlaust land varðandi stríðið í Úkraínu en á sama tíma átt í góðum samskiptum við Moskvuvaldið.

Indland, Nepal og Sri Lanka segja einnig að ríkisborgarar þeirra hafi verið blekktir til að ganga í rússneska herinn og taka þátt í stríðinu í Úkraínu.