Ísraelsmenn segja að Ali Larijani, yfirmaður öryggisráðs Írans, hafi látist í sprengjuárás sem gerð var í nótt. Fjórir dagar eru síðan Ali var myndaður opinberlega í Teheran þar sem hann gekk ásamt þúsundum Írana á Quds-deginum svokallaða.

Þar gagnrýndi hann Trump í beinni útsendingu í viðtali og sagði síðan á samfélagsmiðlinum X að Trump ætti eftir að sjá eftir því að hafa ráðist á Íran.

„Trump segist vera að leita að skjótum sigri. Þó að það sé auðvelt að hefja stríð, þá er ekki hægt að vinna það með nokkrum tístum. Við munum ekki láta undan fyrr en við höfum látið þig sjá eftir þessum alvarlegu mistökum,“ skrifaði hann.

Ísraelsher staðfesti að Larijani, sem er titlaður ritari Þjóðaröryggisráðs Írans, hafi verið skotmark í árásunum í nótt. Segja Ísraelsmenn að herforinginn Gholamreza Soleimani, yfirmaður sjálfboðaliðasveitarinnar Basij, sem heyrir undir Byltingarvörð Írans, hafi einnig verið felldur í árásinni.