Ef svo er þá er eitt slíkt til sölu á Havlundsvej 38 í Egå í Danmörku.
Húsið er 66 ára og eins og áður sagði aðeins 55 fermetra. Mörgum þykir verðmiðinn því vera í hærri kantinum. En kannski finnst sumum þetta ekki mikið fyrir 55 fermetra hús sem býður upp á tvö svefnherbergi og stofu og auðvitað salerni. En það er staðsetning hússins sem skýrir þetta háa verð.
Thomas Bo Jensen, eigandi fasteignasölunnar &Living í Árósum, sagði í samtali við TV2 að það sé ekkert óeðlilegt við verðið því útsýnið frá húsinu sé frábært til allra átta. Á svæðinu séu hús sem kosta sem svarar til um 340 milljóna íslenskra króna.
Húsið er við Skæring Strand en þetta gamla sumarhúsasvæði hefur á síðustu árum gengið í gegnum miklar breytingar og nú er það að stórum hluta orðið að íbúðarhverfi.
Jensen sagði að margir kaupi sumarhús þar, rífi og byggi síðan draumahúsið sitt. Það sé staðsetningin sem laði fólk að. Hann sagðist telja að fasteignaverðið á þessu svæði verði áfram hátt og það eigi einnig við um nýju íbúðarhúsin.
Hann nefndi þessu til stuðnings að í Risskov, sem er ekki langt frá, eru íbúðarhús sem eru metin á sem svarar til um 840 milljóna íslenskra króna.
En litla sumarhúsið hefur nú verið til sölu í rúmlega 400 daga en eitthvað virðist vera að rofa til með söluna á því, því Jensen sagði að tilboð hafi borist í það og telji hann líklegt að samningar takist. Hann vildi að vonum ekki upplýsa hvað tilboðið hljóðar upp á.
Það þarf því væntanlega að hafa hraðar hendur ef takast á að „stela“ húsinu frá tilboðsgjafanum.
