Samkvæmt nýjum tölum frá Oral Health Foundation þá hefur tilfellum krabbameins í munni fjölgað mikið á síðustu árum á Bretlandseyjum. Nú greinast um 10.000 manns með slíkt krabbamein árlega og er þetta 133% aukning frá því sem var fyrir 20 árum. Express skýrir frá þessu.
Það eru aðallega karlar yfir fimmtugu sem fá slíkt krabbamein en það getur auðvitað lagst á alla.
Nigel Carter, forstjóri Oral Health Foundation, sagði að allt of margir greinist of seint með krabbamein í munni og því verði að breyta.
Það sem þú átt að hafa auga með, eru hvítir eða rauðir blettir á tungunni eða í munninum, sem birtast á meðan þú tannburstar þig.
En það eru einnig önnur hættumerki sem er hægt að sjá. Til dæmis sár sem grær ekki, óútskýranlegir hnútar eða bólgur og verkir í munni eða hálsi.
Oftast er þetta meinlaust en það getur skipt miklu máli að láta lækna skoða þetta sem fyrst því ef um illkynja mein er að ræða, þá getur skipt sköpum að meðferð hefjist snemma.
Hættan á krabbameini í munni eykst mjög ef fólk reykir eða drekkur mikið áfengi. En þetta krabbamein getur líka tengst HPV-sýkingum sem sífellt fleiri verða fyrir.
Þetta eru einkennin sem er rétt að hafa í huga:
Sár í munninum sem er ekki horfið eftir þrjár vikur.
Rauðir eða hvítir blettir í munninum.
Hnútur í munninum eða á vör.
Verkir í munninum.
Erfiðleikar við að kyngja.
Erfiðleikar með að tala eða hæsi.
Hnútur í hálsinum eða á hálsinum.
