Adam var ekki lengi í paradís hjá nýkjörnum forseta Bandaríkjanna, Donald Trump en DailyMail greinir frá því að deilur séu komnar upp í hans innsta hring.

„Að sigra kosningarnar hjálpaði til við að gera allt betra um stund, en þetta er eftir sem áður pólitík og þar eru alltaf sakir til að gera upp og ágreiningur,“ sagði heimildarmaður sem mun vera kunnugur innsta kopp forsetans.

Miðlinum Axios hefur verið bent á uppákomu sem átti sér stað á heimil Donald Trump, Mar-a-Lago í Flórída, í síðustu viku en þar mun Elon Musk hafa lent upp á kant við ráðgjafann Boris Epshteyn. Sagan segir að Musk hafi brugðist ókvæða við þeim áhrifum sem Epshteyn hefur haft hvað varðar úthlutun hæstu embætta í væntanlegri ríkisstjórn Trump. Musk sakaði ráðgjafann um að hafa lekið upplýsingum í fjölmiðla, en Epshteyn sagðist ekki hafa hugmynd um hvað auðkýfingurinn væri að tala um.

Á sama tíma hafi staða Musk, sem nánasti samstarfsmaður Trump, farið öfugt ofan í marga í innsta hringnum. Munu margir bíða þess með eftirvæntingu að Musk falli í ónáð, en það er talið óumflýjanlegt þar sem báðir auðkýfingarnir eru með athyglissýki á hæsta stigi og þoli illa að deila sviðsljósinu.

Heimildarmaður DailyMail gefur þó lítið fyrir þessar hugleiðingar. Epshteyn og Musk hafi átt í góðum samskiptum og oft setið saman að snæðingi við sama borðið í Mar-a-Lago. Miðillinn tekur þó fram að eftir sem áður sé það nokkuð ljóst að margir strangtrúaðir Trumpistar séu pirraðir yfir þeim tökum sem Musk hefur á forsetanum sem og tíð ummæli Musk um embættisveitingar og stefnumál.

„Hann þarf að hafa sig hægan. Það er bara pláss fyrir einn forseta og það er tekið eftir því að hann er að framleiða mikið af fyrirsögnum,“ sagði einn heimildarmaður.

Aðrir hafa beint pirringi sínum að Epshteyn sem er talinn hafa átt lykilþátt í að hinn umdeildi Matt Gaetz var tilnefndur sem dómsmálaráðherra.