Eins og greint hefur verið frá reið jarðskjálfti yfir Taiwan í nótt, að íslenskum tíma, um klukkan 8 að morgni að staðartíma. Skjálftinn er sagður hafa verið á bilinu 7,2-7,7 að stærð. Um 700 manns hafa slasast og að minnsta kosti 7 manns hafa látist. Íslenska utanríkisráðuneytið hefur beitn þeim tilmælum til Íslendinga á Taiwan að láta aðstandendur vita af sér og hafa samband við borgaraþjónustu ráðuneytisins ef þeir þarfnast aðstoðar.
Á myndbandi sem birt er í frétt fjölmiðilsins Unilad um skjálftan og fengið er af X-síðu annars fjölmiðils, BNO news, má glöggt sjá hvílíkur ógnarkraftur var í skjálftanum. Myndbandið er fengið úr myndavél í mælaborði bíls sem var á ferð þegar ósköpin dundu yfir. Í myndbandinu má sjá veginn og nærstadda bíla, þar á meðal rútu, hristast af miklum krafti.
WATCH: Dashcam captures 7.4 quake on highway in eastern Taiwan pic.twitter.com/P6oJetpML7
— BNO News (@BNONews) April 3, 2024
Í umfjöllun Unilad kemur fram að skjálftin hafi átt upptök sín á austurhluta Taiwan. Þetta er stærsti jarðskjálfti sem riðið hefur yfir eyjuna síðan 1999 þegar jarðskjálfti, sem mældist 7,6 að stærð, varð til þess að 2.400 manns létust og 10.000 manns slösuðust.
Þó nokkrar byggingar eru sagðar hafa hrunið í skjálftanum sem reið yfir í morgun. Á myndbandinu má sjá að hann stóð yfir í rúma hálfa mínútu.
Kona nokkur, íbúi í höfuðborginni Taipei, segist vera vön jarðskjálftum en þessi hafi verið öðruvísi. Í fyrsta sinn hafi hún grátið af hræðslu vegna jarðskjálfta.
Konan segist aldrei hafa fundið jafn mikinn hristing og íbúð hennar, sem er á 5. hæð, hafi hrists af gífurlegum krafti.
Bjarga hefur þurft fjölda manns úr hrundum byggingum og fólk og farartæki eru sögð föst í jarðgöngum en björgunaraðgerðir standa nú yfir.
