Um þetta var fjallað á vef Videnskab.
Jan Pravsgaard Christensen, prófessor vinnur við rannsóknir á ónæmiskerfi fólks og viðbrögðum líkamans við sjúkdómum. Hann sagði ekki óalgengt að fólk veikist um leið og tími er kominn til að slappa af eftir álagstíma í vinnunni eða stórt próf.
„Þetta er eitthvað sem margir upplifa og þetta gerist oft þegar maður hefur lokið stóru verkefni og er á leið í frí, skyndilega bomm og kvefið eða flensan kemur,“ sagði hann.
Hann sagði að ástæðan fyrir þessu sé að ekki sé hægt að fresta sjúkdómum. Þegar sjúkdómur vilji smita okkur, þá geri hann það. En ástæðuna fyrir því má rekja til ónæmiskerfis okkar. Því má skipta í meðfædda ónæmiskerfið og áunna ónæmiskerfið.
Christensen sagði að þegar bakteríur og sýkingar reyna að ráðast á líkamann taki meðfædda ónæmiskerfið fyrst á móti þeim. Þetta ónæmiskerfi ráði við 99% af þeim örverum og sýkingum sem fólk kemst í snertingu við. Þegar meðfædda ónæmiskerfið er undir of miklu álagi kemur áunna ónæmiskerfið til aðstoðar en það er svolítið lengur að komast í gang og þá finnum við fyrir veikindum.
Hann sagði að þegar við erum undir miklu álagi byrji meðfædda ónæmiskerfið að vinna betur. Þegar við erum stressuð framleiðir líkaminn stresshormóna eins og adrenalín og þeir geta haft áhrif á meðfædda ónæmiskerfið. Þeir virkja fjölda fruma í því og því geti meðfædda ónæmiskerfið verið skilvirkara þegar við erum stressuð.
Þegar hann var spurður af hverju við veikjumst þegar við byrjum að slappa af eftir álagstímabil sagði hann að við þurfum alltaf að vera með ákveðinn fjölda veira í lungunum áður en við fáum flensu. Ef við erum stressuð séu þessar veirur kannski ekki svo margar og því nái sjúkdómurinn sér ekki á strik. En um leið og ónæmiskerfið slakar á og vinnur ekki eins vel, þá sé veiran tilbúin og við veikjumst.
