Daginn eftir fannst lík hennar. Það var hulið með möl og hún hafði verið afklædd. Töskuól var vafin um háls hennar.
Oxygen segir að í desember hafi Gene Clarence Meyer, 66 ára, verið handtekinn vegna málsins. Hann er grunaður um að hafa nauðgað Betty og drepið hana.
Lögreglan byggir þetta á niðurstöðum DNA-rannsókna.
Árið 1988 bjó Meyer um einn kílómetra frá staðnum þar sem lík Betty fannst. Skömmu eftir morðið flutti hann til Washington sem er í um 3.000 km fjarlægð. Þegar lík Betty var krufið fundust lífsýni á því en þau komu ekki að gagni á þessum tíma en eftir því sem DNA-tækninni hefur fleygt fram hefur opnast fyrir fleiri möguleika við rannsóknir gamalla sakamála.
Nýlega var gerð leit í DNA-gagnagrunni þar sem DNA úr lífsýnunum, sem fundust á líkinu, var borið saman við gögnin í gagnagrunninum í þeirri von að þannig myndi morðinginn finnast eða einhver skyldur honum. Niðurstaðan var að aðeins Meyer og bróðir hans kæmu til greina. Bróðirinn lét lögreglunni lífsýni í té og niðurstaða rannsóknar á því útilokaði að hann væri morðinginn.
Alríkislögreglumenn höfðu upp á Meyer í Washington. Þeir náðu lífsýni af handfangi flutningabíls hans og gaf það svörun við því DNA sem fannst á líki Betty. Hann var því handtekinn og situr hann nú í fangelsi í Washington og bíður framsals til Wisconsin.