Hættan á hruni samfélags manna á heimsvísu eða útrýmingu mannkyns hefur verið „hættulega vanmetin“ að því er loftslagsvísindamenn segja í nýrri greiningu.

Þeir kalla slíkar hamfarir „lokastig loftslagsbreytinga“. Þeir segja að þótt litlar líkur séu á að þetta gerist þá sé ekki hægt að útiloka það. Ástæðan sé óvissa um losun gróðurhúsalofttegunda í framtíðinni og áhrif þess á loftslagið. The Guardian skýrir frá þessu.

Vísindamennirnir segja að heimsbyggðin verði að fara að undirbúa sig undir að allt geti farið á versta veg. Þeir skora einnig á the Intergovernmental Panel on Climate Change að gera sérstaka skýrslu um málið.

„Það er fullt af ástæðum til að telja að loftslagsbreytingarnar geti valdið miklum hamförum, jafnvel þótt hækkun hita verði ekki svo mikil,“ er haft eftir Dr Luke Kemp, hjá University of Cambridge, sem stýrði vinnu vísindamannanna.