Niðurstöður nýrrar rannsóknar benda til að um einn milljarður ungra einstaklinga geti orðið fyrir heyrnartapi. En góðu fréttirnar eru að það er hægt að gera eitthvað í málinu. Þetta er sem sagt ekki óumflýjanlegt.
Ef þú ert meðal þeirra sem finnst gaman að hlusta á fréttir, hlaðvarp eða spila lagalistann þinn í símanum? Ef svo er, þá ertu ein(n) af mörgum sem eru í þessum hópi.
Það er vitað að mjög margir gera þetta en vandinn í sambandi við þetta er hversu lengi hljóðin berast úr hátölurunum og þá of hátt.
Í umfjöllun CNN um rannsóknina, sem hefur verið birt í BMJ Global Health, er haft eftir Lauren Dillard, hjá Medical University of South Carolina, að rannsakendur hafi komist að þeirri niðurstöðu að um einn milljarður einstaklinga á aldrinum 12 til 34 ára um allan heim eigi á hættu að verða fyrir heyrnarskaða vegna þess hvernig þeir hlusta á tónlist og fleira. Dillard vann að rannsókninni.
Hún sagði að ef hlustað sé of lengi í einu í heyrnartólum þá veiki það frumur í eyranu sem og uppbyggingu þess. Þetta geti orðið varanlegar skemmdir sem leiða til heyrnartaps eða tinnitus eða beggja í einu.
Það er þó ekki bara hægt að varpa sökinni á heyrnartól því hávaði á til dæmis tónleikum, börum og næturklúbbum getur einnig valdið skaða.
Viðunandi hávaðastig er 85 desíbel sem dreifast á 40 klukkustundir á viku. Ef fólk notar heyrnartól í 2,5 klukkustundir á dag, þá svarar það til 92 desíbela að sögn vísindamannanna.