Fyrir þremur vikum síðan reið fellibylurinn Ian yfir Flórída. Í kjölfarið hefur kjötétandi baktería herjað  í Lee-sýslu. Þar hafa 29 greinst með sjúkdóminn og fjórir hafa látist.

BBC skýrir frá þessu. Það er bakterían Vibrio vulnificus sem á í hlut.

BBC segir að allir þeir 29, sem hafa greinst með sjúkdóminn, hafi greinst eftir að fellibylurinn gekk yfir.

Sýkingar af völdum Vibrio vulnificus geta orðið ef bakteríurnar komast inn í líkamann í gegnum opin sár. Bakteríurnar lifa í heitu sjóblönduðu vatni eins og flóðavatnið í Flórída er.

Talsmaður heilbrigðisyfirvalda í Lee-sýslu, segir að óeðlileg aukning hafi orðið á smitum af völdum Vibrio vulnifus í kjölfar fellibylsins.

Sunnan við Lee ser Collier-sýsla. Þar hafa þrjú tilfelli greinst sem eru talin tengjast fellibylnum.

Í heildina hafa 11 látist af völdum bakteríunnar í Flórída það sem af er ári. Í heildina hafa 65 smit greinst og telja yfirvöld að um helmingur þeirra hafi komið upp í kjölfar fellibylsins.

Vibrio vulnificus er þekkt sem kjötétandi baktería. Einn af hverjum fimm, sem smitast, lifir veikindin ekki af. Sjúkdómsferlið er mjög hratt og venjulega líða aðeins einn eða tveir dagar þar til sjúklingurinn deyr.