Hún sagði frá þessu á heimasíðu sinni. Þar sagði hún að þegar hún sá húsið hafi hún verið viss um að enginn byggi í því þar sem ástand þess var svo slæmt. Hún gekk að dyrunum og opnaði þær en trúði varla eigin augum þegar hún sá gamlan mann inni. Hann sagðist heita Lawrence og ólíkt Leslie var hann ekki á ferð um landið, hann bjó í húsinu.
„Hann átti erfitt og þess vegna eyddi hann mestu af tíma sínum inni í húsinu. Aleinn. Hann hafði misst hægra eyrað og var með gláku á vinstra auganu. En meira að segja þegar hann hitti ókunnugan, sem hafði eiginlega raskað einkalífi hans, var hann bara vingjarnlegur og almennilegur. Hann leyfði mér meira að segja að taka myndir. Hann var svo fallegur að innan og ég vildi gjarnan heimsækja hann oftar,“ skrifaði hún.
Þegar Leslie hafði lokið við myndatökuna lofaði hún Lawrence að hún myndi koma aftur í heimsókn og það stóð hún við. Hún hafði áttað sig á að hann var einstæðingur sem hafði það ekki gott. Hún ákvað að reyna að bæta úr þessu og fór því að taka mat og drykk með þegar hún heimsótti hann.
Hún heillaðist af vingjarnleika hans og að hann hefði opnað heimili sitt fyrir henni. Hann var mjög veikburða og gat þess vegna ekki sinnt viðhaldi á húsinu né garðinum. Leslie ákvað því að aðstoða hann við þetta.
En fljótlega kom í ljós að húsið var við það að hrynja og því gat hann ekki búið í því til frambúðar að óbreyttu. Hún hjálpaði honum því að gera endurbætur á því og þrífa svo það væri vænlegri kostur til að búa í. Eftir því sem vinátta þeirra þróaðist opnaði Lawrence sig meira um líf sitt. Hann reyndist hvorki eiga fjölskyldu né vini sem gátu hjálpað honum eða annast.
„Hann sagði mér svolítið dag einn, sem ég mun alltaf muna. Hann sagði að dagurinn sem ég kom hafi verið besti dagur lífs hans,“ skrifaði Leslie og bætti við: „Ég skil mjög vel hvernig honum leið. Því besti dagurinn í lífi mínu var nefnilega þegar ég hitti hann. Hann veitti mér tækifæri til að breyta lífi manns.“
Góð vinátta tókst með þeim en því miður lá ljóst fyrir að heilsufar Lawrence var ekki upp á marga fiska. „Eftir nokkrar ferðir til læknis er ljóst að heilsufar hans er ekki gott og að honum hrakar hratt. Þetta gætu því verið síðustu mánuðirnir sem ég á með vini mínum og því hef ég ákveðið að gera þá eins góða og skemmtilega fyrir hann eins og hægt er,“ skrifaði Leslie á sínum tíma og bætti við: „Hann er búinn að ræða við mig hvernig hann vill að útförin hans verði og að hann vilji gjarnan að ég verði viðstödd. Ég sagði honum að ég gæti ekki hugsað mér að vera ekki viðstödd.“
