Næstu átján mánuði verða Danir að sætta sig við að lifa með ýmsum íþyngjandi sóttvarnaaðgerðum að mati danskra sérfræðinga. Þeir segja að baráttan við heimsfaraldurinn muni halda áfram í haust þrátt fyrir að bólusetningar hafi gengið vel. Það er því full ástæða fyrir Dani til að skerpa á þolinmæðinni og búa sig undir glímu við veiruna næstu mánuði og jafnvel ár.

TV2 skýrir frá þessu. Fram kemur að sérfræðingarnir segi að það sé aðallega vegna takmarkaðs ónæmis meðal barna sem reikna megi með að veiran muni herja næstu árin. Ekki sé hægt að ná hjarðónæmi eins og er.

„Ég tel að við verðum að fara í gegnum tvö til þrjú ár með faraldrinum áður en við náum nægilega miklu ónæmi meðal barna til að við getum sagt að veiran sé komin í það mikið jafnvægi að við getum lifað með henni eins og inflúensu,“ er haft eftir Allan Randrup Thomsen, veirufræðingi hjá Kaupmannahafnarháskóla.

Viggo Andreasen, lektor í stærðfræðilegri faraldsfræði við Hróarskelduháskóla, tók í sama streng. „Ef þú hefði spurt mig fyrir sex mánuðum hefði ég sagt að í haust gætum við sleppt smitinu lausu en staðan er ekki þannig lengur. Með svo smitandi afbrigði eins og Deltaafbrigðið er þá verða miklu fleiri að verða ónæmir áður en við fáum eðlilegt ástand,“ sagði hann.

Þeir voru báðir sammála um að þegar þessi tími verður liðinn muni flestir hinna óbólusettu hafa smitast og þannig muni hjarðónæmi nást. Þá verði staðan sú að veiran leiki lausum hala í samfélaginu en á því stigi að hún verði viðráðanleg.

Andreasen sagðist telja að í framtíðinni verði kórónuveiran meira eins og barnasjúkdómur á borð við rauða hunda. Börn smitist snemma á ævinni og verði ekki eins alvarlega veik. Líklega muni veiran koma í bylgjum á fimm til tíu ára fresti eins og kíghósti en hún verði ekki eins alvarleg og áður því margir hafi áður smitast af henni.

Mat beggja er byggt á að veiran stökkbreytist ekki frekar því erfitt sé að spá fyrir um afleiðingarnar ef hún stökkbreytist meira.