Kannski má segja að Breivik hafi fengið nokkurs konar stöðu Voldemort, sem er illmennið í sögunum um Harry Potter, því Norðmenn forðast að nefna nafn hans og ræða um hann og vilja ekki veita honum neina athygli. Yfirleitt er hann bara kallaður „hryðjuverkamaðurinn“. Það gerir Jens Stoltenberg, sem var forsætisráðherra fyrir 10 árum, alltaf en hann sleppir því algjörlega að nefna hann með nafni. Norskir fjölmiðlar beindu sjónum sínum að fórnarlömbunum í gær og minntust varla á Breivik og birtu ekki myndir af honum. Það má því segja að norska þjóðin hafi brugðist við hryðjuverkunum á allt annan hátt en Breivik vildi því með því að sleppa því að tala um hann fær hann ekki athygli og það gera skoðanir hans heldur ekki.
Breivik var dæmdur í 21 árs fangelsi árið 2012. Ólíklegt má teljast að honum verði nokkru sinni sleppt lausum því þegar afplánun dómsins lýkur er hægt að framlengja hann um fimm ár í einu ef samfélaginu er enn talin stafa ógn af honum. Þessum fimm ára framlengingum er hægt að beita svo lengi sem þörf krefur, allt þar til Breivik deyr.
Markmið hans með hryðjuverkunum var að hans sögn að bjarga Noregi frá vaxandi íslamsvæðingu og „menningarlegu tjóni“ sem hann taldi vera að eiga sér stað í Noregi og Evrópu. Í Osló létust 8 þegar sprengja, sem Breivik hafði komið fyrir, og á Útey skaut hann 69 ungmenni, allt niður í 14 ára gömul, til bana. Þau voru þar samankomin á sumarráðstefnu ungliðahreyfingar Verkamannaflokksins sem er flokkur jafnaðarmanna.
Breivik, sem kallar sig Fjotolf Hansen í dag, hefur ekki haft mikil samskipti við umheiminn eftir að móðir hans lést 2013. Hann hefur aðeins hitt lögmenn og fangaverði nema hvað að fyrir tveimur árum fékk hann heimsókn frá samfanga sínum.
Breivik hefur kvartað yfir skorti á tækifærum til að vera í sambandi við fólk í fangelsinu og utan þess. Hann kærði norska ríkið 2016 vegna þess sem hann taldi slæmar aðstæður sínar í fangelsinu. Hann tapaði málinu fyrir norskum dómstólum og Mannréttindadómstóli Evrópu.
