Vísindamenn telja sig vera búna að leysa ráðgátuna um kattadrápin í Lundúnum á árunum 2014 til 2018 en þá voru 400 kettir drepnir. Hræ þeirra voru illa leikin og óttuðust margir að „raðkattamorðingi“ gengi laus í borginni.  Hann fékk meira að segja viðurnefnið „Croydon cat killer“.

Nýverið birtu vísindamennirnir niðurstöður rannsóknar sinnar í tímaritinu Veterinary Pathology. Þær styðja kenningu Lundúnalögreglunnar um að engin raðkattamorðingi hafi verið að verki og að raunar hafi mannshöndin ekki komið nærri drápum á köttunum.

Kettirnir voru drepnir á ýmsum stöðum í borginni og fjölmiðlar veltu því upp að „kattadrápari“ gengi laus í borginni. Margir óttuðust að fólki stafaði ógn af þessum manni. Lögreglan hóf umfangsmikla rannsókn sem gekk undir nafninu „Operation Takahe“.

En niðurstaða DNA-rannsókna á 32 kattarhræjum, sem lögreglunni voru afhent, sýndu að mannshöndin hafði ekki komið nærri drápunum á köttunum. Vísindamennirnir leituðu einnig að lífsýnum úr refum, hundum og greifingjum á hræjunum og krufðu þau.

Niðurstaða þeirra er að lífsýni úr refum voru á hræjunum og segja þeir að refir hafi drepið kettina. Þeir segja einnig að áverkar á hræjunum passi við að refir hafi drepið þá.

Hvað varðar þau hræ sem engir greinilegir áverkar eftir refi fundust á segja þeir að þeir kettir hafi drepist við ákeyrslu og lifrarbilun eftir að hafa drukkið frostlög. Átta af köttunum 32 höfðu glímt við hjartasjúkdóm.