Hvað er til ráða þegar ekki er lengur pláss á sjúkrahúsum og ekki fleira starfsfólk til að annast þá veiku? Á sama tíma streyma COVID-19-sjúklingar inn á sjúkrahúsin. Jú, það er lagt mat á hverjir eru líklegastir til að lifa af, þeir fá meðhöndlun en hinir eru látnir sæta afgangi.
Þetta er sú staða sem Austurríkismenn eru nú að búa sig undir. Sjúkrahúsin í landinu eru að verða yfirfull af COVID-19-sjúklingum og enn streyma sjúklingar inn samhliða því að smitum fjölgar.
Bitur reynsla hefur kennt heilbrigðisstarfsfólki að álagið á gjörgæsludeildirnar kemur fram um þremur vikum eftir að smitin fara á flug.
Í Salzburg hefur nú sérstakt teymi verið sett á laggirnar sem á forgangsraða sjúklingum. Þetta er undirbúningur undir að fljótlega mun sú staða koma upp að ekki verður hægt að annast alla sjúklinga og því þurfi að gera upp á milli þeirra og finna þá sem tímafrek og flókin meðhöndlun mun gagnast mest.
Um níu milljónir manna búa í Austurríki en þar eru smitin í hæstu hæðum. Í gær greindust um 13.800 smit og 27 létust af völdum COVID-19. Daginn áður voru smitin um 14.000 og andlátin 22. Um 2.000 COVID-19-sjúklingar liggja á sjúkrahúsum, þar af 418 á gjörgæsludeildum.
Álagið er mikið á sjúkrahúsin og dæmi eru um að þurft hafi að geyma lík í anddyrum sjúkrahúsa. Heilbrigðisstarfsfólk segist ekki lengur hafa tíma til að sinna hjartveiku fólki og að ef tími vinnist til að sinna sjúklingum séu þeir í smithættu því COVID-19-sjúklingarnir séu svo margir að erfitt sé að halda reglur um sóttkví.
Heilbrigðiskerfið er komið að þolmörkum og ríkisstjórnin er ekki í neinum vafa hverjum er um að kenna. „Þeir óbólusettu bera ábyrgð á árás á heilbrigðiskerfið okkar,“ sagði Alexander Schallenberg, kanslari, á fréttamannafundi á föstudaginn.
Aðeins 65% Austurríkismanna hafa lokið bólusetningu.
Austurríkismenn standa því frammi fyrir erfiðum aðstæðum eins og mörg ríki í Evrópu gera einnig. Vegur frelsi einstaklingsins til að segja nei við bólusetningu meira en þau líf sem sú ákvörðun getur kostað? Í Austurríki er þolinmæði yfirvalda gagnvart þeim sem vilja ekki láta bólusetja sig á þrotum.
„Í hringiðu, sem andstæðingar bólusetninga og falsfréttir hafa skapað, eru of margir óbólusettir. Afleiðingin er yfirfullar gjörgæsludeildir og hrikalegar þjáningar,“ sagði Schallenberg á fréttamannafundinum á föstudaginn. Hann tilkynnti síðan að frá febrúar á næsta ári verði Austurríkismönnum gert skylt að láta bólusetja sig. Ef fólk gerir það ekki munu sektir og fangelsisrefsingar liggja við því.
