Brasilíska lögreglan felldi 25 grunaða bankaræningja í borginni Varginha á sunnudaginn. Lögreglan segir að hópurinn hafi verið að undirbúa bankarán. Það var herlögreglan í Minas Gerais sem lét til skara skríða gegn genginu og felldi 25 meðlimi. Einnig fannst mikið af vopnum, sprengiefni og skotheldum vestum.
Talið er að um einu stærstu lögregluaðgerð sögunnar gegn glæpagengjum, sem sérhæfa sig í bankaránum, sé að ræða í Brasilíu. Á síðustu árum hefur bankaránum, framin af þungvopnuðum glæpagengjum, fjölgað mikið í landinu.
Fyrir tveimur mánuðum var bankarán framið nærri Varginha og komst það í heimsfréttirnar því ræningjarnir notuðu sprengiefni og tóku gísla. Suma þeirra bundu þeir við bíla sína og notuðu þannig sem lifandi skildi.
Í aðgerðinni á sunnudaginn réðst lögreglan til atlögu við tvo sveitabæi þar sem meðlimir gengisins héldu til. Til skotbardaga kom og féllu 25 ræningjar.
