Ef þú átt 28 milljónir dollara á lausa þá er hægt að nota peningana til að kaupa glæsihús í Bel-Air í Los Angeles. Húsið er heilir 700 fermetrar og í því eru sjö svefnherbergi, fimm baðherbergi, sundlaug og garður með fullt af pálmatrjám. En það er einn galli við að kaupa húsið, því fylgir eiginlega nafn núverandi eiganda og það eru ekki allir sem tengja það við jákvæða hluti.
Eigandi hússins er Ibrahim bin Laden, sem eins og nafnið gefur til kynna er bróðir hryðjuverkamannsins Osama bin Laden sem var heilinn á bak við árás al-Kaída á Bandaríkin í september 2001. New York Post skýrir frá þessu.
Bin Laden hefur átt húsið síðan 1983 en hann hefur ekki komið þangað eftir hryðjuverkaárásina 2001. Hann var í fríi erlendis þegar hún var gerð og hefur ekki þorað að snúa aftur af ótta við að nafn hans valdi honum vandræðum.
Húsið hefur því staðið tómt í tæp tuttugu ár og má nýr eigandi því reikna með að þurfa að sinna margvíslegu viðhaldi á húsinu.
