Það gæti farið svo að evrópska hitametið hafi fallið í síðustu viku þegar hitinn mældist 48,8 stig í Syracuse á Sikiley. Þess utan gæti hærri hiti en það mælst í þessari viku en öflug hitabylgja liggur nú yfir Íberíuskaga. Peter Stott, loftslagsfræðingur hjá bresku veðurstofunni, segir að Evrópubúar verði að búa sig undir að í framtíðinni geti hitinn farið yfir 50 stig.
Hitamælingin í Syracuse hefur ekki enn verið staðfest af Alþjóðaveðurfræðistofnunni en óháð því þá segir Stott að mælingin sýni í hvaða átt stefni varðandi hita í álfunni. „Líkurnar á að við sjá öfgahita á hverju sumri eru orðnar ansi miklar,“ segir hann.
„Við getum ekki sagt nákvæmlega hvenær það mun gerast en það mun líklegast gerast við Miðjarðarhafið þar sem áhrif heits lofts frá Norður-Afríku eru mest,“ segir hann.
Núverandi hitamet, sem hefur verið staðfest, er frá 1977 en þá mældust 48 stig í Grikklandi. Stott segir að nýjar greiningar sýni að vegna áhrifa loftslagsbreytinganna sé nú fimm sinnum líklegra að hitamet falli en áður.
