Átökin í Tigray í Eþíópíu geta orðið langvarandi og þær mannlegu þjáningar sem þau valda geta enn aukist og er ástandið þó nógu slæmt nú þegar. Í nýrri skýrslu frá IPC-kerfi Sameinuðu þjóðanna, sem SÞ nota til að kortleggja ótryggt matvælaöryggi, kemur fram að rúmlega 350.000 íbúar í héraðinu glími við hungursneyð og að á næstu mánuðum megi reikna með að margar milljónir til viðbótar lendi í sömu stöðu.
60% íbúa í Tigray og nágrannahéruðunum Amhara og Afar glíma nú þegar við matvælaskort en þetta eru um 5,5 milljónir manna. Mark Lowcodk, yfirmaður neyðarhjálpar SÞ, segir að nú sé hungursneyð ríkjandi í Tigray. Hann sagði að fjöldi þeirra sem glíma við hungursneyð sé sá mesti síðan 250.000 Sómalar létust úr hungri 2011. „Ástandið á eftir að versna mjög mikið,“ sagði hann.
Á grundvelli skýrslunnar hefur fjöldi stofnana SÞ lýst yfir áhyggjum á hættunni á hungursneyð ef átökin harðna enn frekar og starfs hjálparsamtak verður gert erfiðara en það er nú þegar.
Átökin í héraðinu eru á milli stjórnarhersins og uppreisnarmanna en þau hörðnuðu til muna í nóvember á síðasta ári þegar stjórnarherinn var sendur inn í norðurhluta Tigray til að berjast við uppreisnarmenn sem krefjast sjálfstæðis Tigray.
