Margir Danir eru farnir að svitna yfir veðurspánni fyrir vikuna því miklum hita er spáð seinni part hennar. Síðasta helgi var í svalara lagi miðað við það sem fram undan er en hitinn var víða „aðeins“ 16-19 gráður sem verður samt að teljast ansi gott miðað við það veðurfar sem við höfum búið við hér á landi síðustu daga.

Nú er farið að hlýna og á fimmtudaginn tekur hæð sér stöðu austan við Danmörku og dælir heitu lofti norður á bóginn frá austurhluta Evrópu. Spáð er um 30 stiga hita á fimmtudaginn í suðurhluta landsins.

Á föstudaginn hækkar hitinn en og er spáð allt að 33 stiga hita í suðurhluta landsins.

En þetta verður skammvinn hitabylgja því spár gera ráð fyrir rigningu á laugardagskvöldið og kólnandi veðri og eins og svo oft gerist eftir svona háan hita gæti orðið þrumuveður.