Nýlega ætlaði Gemma Cargin, 25 ára, að fljúga frá Manchester á Englandi til Belfast á Norður-Írlandi. Á einhvern ótrúlegan hátt tókst henni að fara um borð í ranga flugvél. Það gerðist þrátt fyrir að á flugvellinum væri auðvitað hefðbundinn búnaður til að skanna brottfararspjöld.

BBC segir að eftir flugtak hafi Gemma ákveðið að fá sér smá blund en flugið átti að taka 40 mínútur. Þegar hún vaknaði var vélin enn á lofti. „Þeir sögðu að við myndum lenda eftir klukkustund og 15 mínútur. Ég spurði því hvort vélin væri ekki á leið til Belfast,“ sagði hún í samtali við BBC.

Hún fékk þá að vita að vélin væri á leið til Gíbraltar.

Gemma flýgur mikið á milli Manchester og Belfast og hafði aldrei áður lent í vandræðum með að hitta í rétta flugvél. En einn bilaður upplýsingaskjár á flugvellinum gerði henni óleik.

„Það var ekki kveikt á skjánum við brottfararhliðið svo mig grunaði aldrei að ég væri að fara um borð í ranga flugvél,“ sagði hún.

EasyJet sá um að koma henni aftur til Manchester og áfram til Belfast.