Þegar eldgos hófst nýlega í eldfjallinu Nyiragongo í Lýðstjórnarlýðveldinu Kongó þurftu mörg þúsund manns að flýja heimili sín í Goma undan hraunstraumnum. Hjúkrunarfræðingar á sjúkrahúsi í borginni stóðu þá frammi fyrir erfiðustu ákvörðun lífs síns.

Þeir þurftu að velja á milli að leggja á flótta til að bjarga lífi sínu eða verða eftir hjá konum, sem voru að fæða, og gátu ekki lagt á flótta.

Stanislas Kaylyanga, hjúkrunarfræðingur, var að sinna tveimur konum, sem voru með hríðir, þegar eldgosið hófst. „Það var erfitt að þurfa að yfirgefa þær. Ég hugsaði með mér að ef við myndum deyja þá myndum við deyja fyrir sjúklingana,“ sagði hann að sögn TV2.

Hann ákvað að leggja ekki á flótta og verða eftir hjá konunum. Flory Kubuya tók sömu ákvörðun. „Við höfum svarið þess eið að sinna sjúklingum okkar,“ sagði hún. Hún sagðist því hafa ákveðið að vera eins lengi hjá konunum og hún gæti og myndi þá frekar leggja á flótta síðar ef þörf krefði.

Nyiragongo er talið eitt hættulegasta eldfjall heims. Öflugt gos byrjaði þar 22. maí og fylgdu því miklir hraunstraumar sem runnu yfir fjölda bæja og inn í Goma en þar búa tæplega 700.000 manns. Að minnsta kosti 32 létust, flestir eftir að hafa andað að sér eitruðum lofttegundum.

Mörg hundruð jarðskjálftar hafa riðið yfir svæðið síðustu daga og jarðfræðingar vara við hættu á nýjum hraunstraumi. Einnig óttast sérfræðingar að eiturgufur muni stíga upp frá botni Kivuvatns og því hefur fjöldi íbúa verið fluttur frá Goma.