Hræðslan við stökkbreytt afbrigði kórónuveirunnar, B117 afbrigðið sem stundum er nefnt breska afbrigðið, veldur því að búið er að loka Klinikum Bayreuth í suðurhluta Þýskalands. 99 af 3.300 starfsmönnum sjúkrahússins hafa greinst með kórónuveiruna og því hefur verið gripið til harðra aðgerða.
Bild skýrir frá þessu. Fram kemur að aðeins sé tekið við sjúklingum í bráðatilfellum og að búið sé að aflýsa öllum fyrirhuguðum aðgerðum. Með bráðatilfellum er átt við hjartaáföll, blóðeitranir, endurlífgun, heilablóðfall, mikla áverka og heilaskaða.
Ekki er hægt að útskrifa sjúklinga fyrr en tvær neikvæðar niðurstöður úr kórónuveirusýnum liggja fyrir. Frank Schmälzle, talsmaður sjúkrahússins, sagði að staðan væri erfið en ekki farin úr böndunum.
11 af smituðu starfsmönnum eru með B117 afbrigðið. Allir aðrir starfsmenn sjúkrahússins verða að vera í sóttkví og mega ekki nota almenningssamgöngur.
