Bandaríska lyfjafyrirtækið Moderna er komið langt áleiðis við þróun bóluefnis gegn kórónuveirunni. Þann 27. júlí hefst þriðja stig tilrauna með bóluefnið en þá verður byrjað að fá 30.000 sjálfboðaliða til að taka þátt í tilrauninni. Helmingur þeirra verður sprautaður með bóluefninu en hinn með lyfleysu.

Fyrri stig þróunar bóluefnisins hafa lofað góðu og því er komið að þessu stóra skrefi. Tilraunin á að leiða í ljós hvort bóluefnið geti komið í veg fyrir að fólk smitist af kórónuveirunni. Bóluefnið gæti einnig orðið velheppnað, þótt það komi ekki í veg fyrir smit, ef það kemur í veg fyrir verstu einkenni COVID-19.

Þriðja stig tilraunarinnar stendur yfir til 27. október að því er segir á heimasíðunni clinicaltrials.gov.

Tilkynnt var um þetta eftir að vísindaritið New England Journal of Medicine skýrði frá niðurstöðum tilrauna Moderna á þriðjudaginn. Í þeim tóku 45 sjálfboðaliðar þátt og mynduðu þeir allir mótefni gegn veirunni.