New Yorkt Times og Washington Post skýra frá þessu. Blöðin segja að þetta komi fram í spá frá bandarísku smitsjúkdómastofnunni CDC sem blöðin komust yfir. Samkvæmt henni munu um 200.000 smit greinast daglega frá því í byrjun júní. um 3.000 manns munu látast daglega af völdum sjúkdómsins.
Núna eru um 25.000 til 30.000 ný smit staðfest daglega og 1.500 til 2.000 látast af völdum sjúkdómsins. Talsmenn Hvíta hússins draga ekki uppruna spárinnar í efa en segja að um vinnuskjal CDC sé að ræða og leggja áherslu á að það hafi ekki verið tekið fyrir af aðgerðateymi Donald Trump varðandi COVID-19 faraldurinn né samþykkt af öðrum stofnunum.
Judd Deere, talsmaður Hvíta hússins, sagði að spáin endurspegli ekki þá útreikninga sem aðgerðateymið hafi gert eða þau gögn sem teymið hefur unnið út frá. Hann sagði að sú stefna Donald Trump, forseta, að opna landið á nýjan leik í áföngum sé byggð á vísindalegum grunni sem sérfræðingar í heilbrigðis- og farsóttarmálum styðji.
Trump hefur sagt að 100.000 dauðsföll séu versta útkoman sem geti orðið en samkvæmt spánni þá verður raunveruleikinn allt annar. Nú þegar hafa um 68.000 manns látist af völdum sjúkdómsins í Bandaríkjunum.
Önnur spá frá University of Washington sýnir að um 135.000 muni væntanlega hafa látið lífið af völdum sjúkdómsins um miðjan mars. Er þá miðað við líklegustu framvindu faraldursins en miðað við að hann hegði sér öðruvísi geta dauðsföllin orðið á bilinu 95.000 til 200.000.