Nýlega var vasaúri stolið úr forngripaverslun í Lundúnum. Þetta er ekki bara eitthvað úr heldur úr sem Woodrow Wilson, Bandaríkjaforseti, gaf Charles J Lawrenson, skipstjóra breska gufuskipsins Nubian, fyrir björgun á sjó þann 7. mars 1914 en þá bjargaði áhöfn hans áhöfn bandarísku skonnortunnar Julia A Trubee. Úrið hefur því sögulegt gildi auk þess að vera ansi verðmætt.
Samkvæmt tilkynningu frá Lundúnalögreglunni kom maður inn í forngripaverslun við Pierrepont Arcade í Islington og ætlaði að kaupa vasa. Ekki fékkst heimild á greiðslukort hans fyrir þeim kaupum og þegar starfsmaður setti vasann aftur í sýningarkassa er talið að maðurinn hafi nýtt tækifærið til að taka úrið sem er 14 karata gullúr með áritun frá Wilson.
Lögreglan birti einnig meðfylgjandi mynd af úrinu.
