Hann opnaði dyrnar á hótelherberginu sínu og fór fram á gang í örskotsstund eða nákvæmlega átta sekúndur samkvæmt því sem upptökur úr eftirlitsmyndavélum sýna. En það var nóg og hann varð sem svarar til 450.000 íslenskra króna fátækari.

Hér er um farandverkamann frá Filippseyjum að ræða sem braut gegn reglum um sóttkví í Taívan. CNN skýrir frá þessu. Hann var í sóttkví á hóteli í Kaohsiung í Taívan en þar eru reglurnar einfaldar og skýrar hvað varðar sóttkví. Það má ekki yfirgefa hótelherbergið. „Fólk í sóttkví á ekki að halda að það fái ekki sekt ef það yfirgefur herbergi sín,“ sagði talsmaður borgaryfirvalda um málið.

Það var starfsmaður á hótelinu sem tilkynnti um brot mannsins eftir að hann sá það á upptökum eftirlitsmyndavéla.

56 hótel, með 3.000 herbergi, eru notuð undir fólk í sóttkví í Kaohsiung. Strangar sóttvarnareglur í landinu hafa greinilega haft áhrif því þar hafa aðeins 716 smit greinst frá upphafi faraldursins og sjö hafa látist. Ekki hefur verið gripið til umfangsmikilla lokanna á ýmiskonar samfélagsstarfsemi heldur hefur verið notast við smitrakningu og sóttkví og háar sektir.