Eldri hjón, sem búa í Stourbridge í West Midlands á Englandi, duttu svo sannarlega í lukkupottinn þegar vinur þeirra og nágranni ánafnaði þeim safni sínu af Star Wars leikföngum og minjagripum. Hjónin höfðu enga hugmynd um hversu verðmætt safnið var fyrr en að sonur þeirra skoðaði það og fékk síðan sérfræðing til að meta það.

Þá kom í ljós að þau voru með eitt besta safn Star Wars muna í heiminum. Nágranni þeirra, Peter Simpson, ánafnaði þeim safninu en hann lést í desember á síðasta ári. Hann hafði safnað Star Wars munum áratugum saman en safnið samanstóð af mörg hundruð munum, þar á meðal plastbrúðum í óopnuðum umbúðum. The Times skýrir frá þessu.

Safnið seldist fyrir sem nemur um 72 milljónum íslenskra króna.

„Margt var aðeins rakt vegna þess hvernig það hafði verið geymt. En í heildina er þetta besta Star Wars safn sem ég hef nokkru sinni séð,“ sagði Chris Aston, hjá Astons Auctioneers, sem verðmat safnið.

Meðal þess sem var selt á uppboði var brúða af stjórnanda Star Destroyer í óopnuðum umbúðum.  Aðeins er vitað um tvær slíkar í heiminum í óopnuðum umbúðum. Hún seldist fyrir sem nemur um 6 milljónum íslenskra króna.