Lögreglan í Eindhoven í Hollandi lagði nýlega hald á 12,5 milljónir evra í reiðufé. Peningarnir fundust í leyniherbergi í íbúð í borginni. Aldrei fyrr hefur hollenska lögreglan fundið svo mikið fé í einu.
35 ára karlmaður var handtekinn í tengslum við málið, hann er grunaður um peningaþvætti. Í íbúðinni fundust einnig vopn og seðlatalningavélar.
Lögreglan telur að peningarnir séu afrakstur skipulagðrar glæpastarfsemi. Um allar tegundir evruseðla á bilinu 5 til 500 evrur var að ræða og vógu þeir samtals 255 kíló.
