Yfirvöld víða um heim hafa lagt hart að almenningi að takmarka samskipti við annað fólk og halda góðri fjarlægð til að koma í veg fyrir smit af völdum kórónuveirunnar COVID-19. Þetta á við í Bretlandi eins og víða annarsstaðar. Meðal þeirra starfsgreina sem finna fyrir þessu er vændi enda um ansi náin samskipti fólks að ræða þegar vændi fer fram.

Kirie Redfield, sem starfar sem vændiskona í Bretlandi, er ekki sátt við þessar reglur og telur starf sitt ekki síður mikilvægt en störf heilbrigðisstarfsfólks þessa dagana. Þetta kemur fram í umfjöllun um málið í Mirror. Redfield er velþekkt í Bretlandi en hún hefur meðal annars komið fram í heimildamyndum um vændi.

Hún hefur haldið áfram að stunda vændi eftir að stjórnvöld settu harðar reglur um samskipti fólks vegna COVID-19 faraldursins. Hún selur blíðu sína í húsbíl sínum og geta karlar fengið fimmtán mínútna samfarir við hana, án þess að nota smokka, fyrir sem svarar til um 5.000 íslenskra króna.

Þegar Mirror spurði hana af hverju hún brýtur gegn reglum sem eiga að hefta útbreiðslu kórónuveirunnar stóð ekki á svari:

„Karlar hafa þörf fyrir sitt, þú skilur. Ég hef ekki áhyggjur af reglunum. Þetta er starf sem ég þarf að sinna, svona eins og læknar og hjúkrunarfræðingar.“

Í umfjöllun Mirror kemur fram að á meðan blaðamaður fylgdist með vinnudegi hjá Redfield hafi karlar beðið í röð, í bílum sínum, eftir að röðin kæmi að þeim.