Eitraður reykur frá brunanum lagðist yfir stór svæði í borginni en mikil blýmengun fylgdi reyknum. Magnið var svo mikið að það ógnar heilsu fólk. Yfirvöld hafa enn ekki viljað opinbera niðurstöður rannsókna á hversu mikið magn blýs var um að ræða. Þau eru nú sökuð um að setja endurbyggingu kirkjunnar ofar í forgangsröðinni en heilsu mörg þúsund manns.
Blýmengun getur haft margvísleg heilsufarsleg áhrif. Ef fólk verður fyrir langvarandi blýmengun getur það haft áhrif á blóðkerfið, taugakerfið, blóðþrýsting, hjarta- og æðakerfið og nýrun. Börn eru sérstaklega viðkvæm fyrir blýmengun því þau taka meira af efninu inn í líkamann en fullorðnir. Barnshafandi konur eru einnig mjög viðkvæmar fyrir blýmengun sem getur borist í fóstrin.
New York Times segir nú að 460 tonn af blýi hafi dreifst um París í brunanum. Yfirvöldum var kynnt innan 48 klukkustunda að hugsanlega hefði hættulega mikið magn af blýi lagst yfir borgina. Samt sem áður var almenningur ekki upplýstur um þetta.
Gögn, sem blaðið hefur komist yfir, sýna að allt að 60 sinnum meira magn blýs en talið er hættulaust mældist við minnst 18 skóla og leikskóla og í almenningsgörðum. Á verstu settu svæðunum mældist magnið allt að 1.300 sinnum meira en ráðlagt er. Allt að 6.000 börn undir sex ára búa innan 800 metra radíuss frá menguðu svæðunum.