Á síðasta ári greiddi danska Þjóðminjasafnið sem nemur rúmlega 141 milljón íslenskra króna til áhugafólks um fornleifafræði. Það er fólki sem leitaði markvisst að fornminjum. Flestir notuðu málmleitartæki í þeirri von að finna eitthvað verðmætt.

Þetta kemur fram í ársskýrslu safnsins. Fram kemur að þetta hafi verið sem nemur um 68 milljónum meira en ráð var gert fyrir og hæsta upphæðin sem greidd hefur verið á einu ári.

Þau lög gilda í Danmörku að þegar fólk finnur forna muni, fjársjóði, teljast þeir vera Danefæ, þar til annað er ákveðið, og tilheyra munirnir ríkinu sem aftur á móti greiðir finnendum fundarlaun. 2.554 skiluðu fjársjóðum inn til safna landsins á síðasta ári og fengu greitt fyrir þá. Allt frá nokkur hundruð krónum upp í rúmlega eina milljón danskra króna. Það var hópurinn Team Rainbow Power sem fékk hæstu upphæðina, sem nemur tæplega 19 milljónum íslenskra króna, en þremenningarnir í honum fundu Fæstedfjársjóðinn árið 2016. Yfirferð yfir fjársjóðinn lauk ekki fyrr en á síðasta ári og því fékk hópurinn ekki greitt fyrr en þá. Í fjársjóðnum voru meðal annars 840 grömm af skíragulli í formi armbanda auk fjölda skartgripa og mynta.