Maðurinn rak augun í stálklæðningu á veggnum sem lét svo sem ekki mikið yfir sér. En þegar hann opnaði klæðninguna sá hann poka í litlu rými inni í veggnum. Þegar pokinn var opnaður kom í ljós málverk sem talið er að hafi horfið á dularfullan hátt fyrir 23 árum – málverk sem er frekar dýrmætt.
Verkið sem um ræðir, Portrait of a Lady, er eftir austurríska listamanninn Gustav Klimt. Klimt fæddist árið 1862 og lést árið 1918 og er í hópi þekktustu listmálara Austurríkis þótt víðar væri leitað. Um er að ræða afar verðmætt listaverk en það er metið á rúma átta milljarða króna.
Verkið hvarf á dularfullan hátt árið 1997, eða um það leyti sem endurbætur stóðu yfir á listasafninu í Piacenza. Lögregla telur að þjófar hafi tekið verkið og komið því fyrir inni í veggnum. Er talið líklegt að þeir hafi ætlað að ná í verkið þegar fjölmiðlaumfjöllun um málið myndi minnka.
Rannsókn á verkinu stendur nú yfir og miðar hún meðal annars að því að sannreyna hvort um sama verk sé að ræða og hvarf eða hvort um endurgerð sé að ræða. Massimo Ferrari, stjórnandi safnsins, er sannfærður um að hið eina sanna verk sé loksins fundið.