Árásarmaðurinn, Javon Johnson, var handtekinn tveimur dögum eftir að þetta gerðist og situr nú í gæsluvarðhaldi. Johnson er sakaður um morðtilraun, líkamsárás og brot á vopnalögum. Talsmaður lögreglunnar sagði að Johnson hafi ekið upp að hlið bílsins, sem drengurinn var í, og skotið á hann. Skömmu áður hafði ökumaður þess bíls flautað á Johnson þegar hann hreyfði bifreið sína ekki úr stað á gatnamótum þrátt fyrir að grænt ljós hafi logað.
Læknar segja ástand drengsins stöðugt og reiknað sé með að hann lifi árásina af.
Michael Harrison, talsmaður lögreglunnar, sagði á fréttamannafundi að árásin væri bein afleiðing af afstöðu íbúa borgarinnar til skotvopna.
„Ákvörðunin um að nota skammbyssu er ekki tekin þegar þú hleypir skoti af. Hún er tekin þegar þú tekur hana með að heiman. Þá hefur þú ákveðið að ef þú hafir þörf fyrir hana munir þú nota hana.“