Hvarf hinnar 17 ára Emilie Meng og morðið á henni sumarið 2016 er enn óleyst og virðist dönsku lögreglunni ekki miða neitt áfram við rannsókn málsins. Eitt hliðarmál morðmálsins kemur fljótlega til kasta dómstóla. Málið snýr að manni, sem býr í Korsør, þar sem Emilie hvarf. Hann taldi að 69 ára nágranni hans hefði numið Emilie á brott og héldi henni fanginni í húsi sínu. Maðurinn boraði því göt í veggi hjá nágrannanum og kom upptökubúnaði fyrir til að geta tekið upp samtöl í húsinu. Grunur mannsins um þetta vaknaði vegna þess að um hríð var lögreglan þessarar sömu skoðunnar.

Jótlandspósturinn segir að nú hafi saksóknarar gefið út ákæru á hendur manninum fyrir hleranirnar. Lögreglan fékk upptökurnar í hendur en ekki er vitað hvort eða þá hvaða máli þær skiptu við rannsókn málsins. Hins vegar er það staðreynd að lögreglan gerði fimm sinnum húsleit heima hjá manninum en ekkert fannst sem tengdi hann við hvarf Emilie. Hann fékk 6.000 danskar krónur í bætur vegna húsrannsóknanna.

Við síðustu húsleitina boruðu sérfræðingar göt í veggi, gólf og sökkul hússins og notuðu myndavélar og skynjara til að leita að leyniherbergjum.