Tuttugu og fimm ára gamall karlmaður, sem var á ferðalagi um Taíland með kærustu sinni og vinum, lést þegar aparóla í Chiang Mai, í norðurhluta landsins, slitnaði.

Um er að ræða eina lengstu aparólu Asíu og er hún mjög vinsæl meðal ferðamanna. Hún er 4,8 kílómetrar að lengd og er hún hæst í rúmlega 90 metra hæð frá jörðu.

Aparólunni var lokað eftir slysið og fer rannsókn á tildrögum slyssins nú fram. Aparólunni var einnig lokað tímabundið árið 2016 eftir að þrír ísraelskir ferðamenn féllu til jarðar eftir að hafa lent í árekstri.