Flestir hafa það eflaust fyrir vana að sinna þrifum heima hjá sér fullklæddir, eða svona nokkurn veginn. En siðir fólks og áhugamál eru mismunandi og sumum þykir eflaust gott að vera naktir, eða því sem næst, á meðan þrifum er sinnt og enn aðrir vilja greinilega fá húshjálp sem sinnir þrifum nakin.

Þetta á við um Daniel Aitken, 26 ára, sem býr í Brighton á Englandi. Hann byrjaði nýlega að bjóða upp á þrif í heimahúsum og sinnir hann þeim nakinn, eða því sem næst því hann klæðist gúmmíhönskum á meðan hann þrífur. Þetta virðist vera góð hugmynd því hann hefur nóg að gera samkvæmt fréttum breskra fjölmiðla.

Daniel starfaði áður við gatnagerð en hefur lagt það starf á hilluna og sinnir nú nektarþrifum. Við hliðina á því býður hann fólki upp á faðmlög gegn greiðslu og hefur að sögn töluvert að gera í þeim efnum.

Daniel segir að flestir viðskiptavina hans séu svolítið sérstakir, sumir séu einmana og aðrir hafi bara góðan húmor. Sumir vilji bara prófa þetta til að geta sagt að þeir hafi fengið nakinn mann til að þrífa húsið sitt. Tímagjald hans er 30 pund. Hann segir að flestir viðskiptavinirnir séu miðaldra.