Allt hófst þetta fyrr í mánuðinum þegar mörgæsaunga var rænt frá foreldrum sínum.
„Þetta hófst í gær. Þegar ég kom til vinnu sá ég að eitthvað mikið var að. Annað foreldraparið var horfið og unga þess hafði einfaldlega verið rænt. Það var annað par, samkynhneigðir karlfuglar, sem höfðu rænt honum og stóðu með hann.“
Sagði Sandie Hedegård Munck, dýragæslukona, í samtali við Danska ríkisútvarpið daginn eftir að atburðarásin hófst.
„Ég held að mamman hafi verið fjarverandi, að synda, og þá hafi karlinn átt að passa ungann. Hann hefur kannski skilið hann eftir eftirlitslausan og þá hefur karlaparið líklegast hugsað með sér að þetta væri synd og tekið ungann.“
Hún sagði að ekki væri óalgengt að mörgæsir ræni ungum enda hafi þær mikinn áhuga á eggjum og ungum.
Unginn virtist hafa það gott hjá „nýju foreldrunum“ en Munck sagðist telja að foreldrar hans myndu sakna hans.
„Ég átti von á að foreldrar hans myndu koma og heimta að fá hann aftur. En karlinn spásseraði bara um eins og hann hefði aldrei átt unga og móðirin virtist vera að leita.“
Hegðun foreldranna skipti sköpum í málinu því ef þeir virtust ekki hafa áhuga á unganum og voru ekki að leita að honum átti samkynhneigða parið að fá að halda honum.
Í myndbandinu hér fyrir neðan sést hluti af dramanum þegar sameina átti ungann og foreldra hans. En samkynhneigða parið var þó ekki skilið eftir í örvæntingu því það fékk egg sem Munck tók frá einstæðri móður sem réði ekki við að liggja á því.
https://www.facebook.com/OdenseZOO/videos/2100354073563106/
Allt endaði þetta því vel. Unginn komst aftur til foreldra sinna, samkynhneigða parið fékk egg til að hugsa um og liggja á og friður og ró ríkir á ný í aðstöðu mörgæsanna.
