Aðalmeðferð í máli gegn Hannesi Valle Þorsteinssyni, sem ákærður er fyrir kynferðisbrot gegn ungu barni, í starfi sínu sem leiðbeinandi á leikskólanum Múlaborg, verður þann 28. apríl næstkomandi, við Héraðsdóm Reykjavíkur.
Samkvæmt ákæru málsins braut Hannes tvisvar gegn sama stúlkubarninu með því að hafa önnur kynferðismök en samræði gegn henni. Hann er þar sagður hafa misnotað freklega yfirburðastöðu sína gagnvart stúlkunni, brugðist trausti hennar og trúnaði hennar, sem starfsmaður leikskólans. Í síðara brotinu er hann jafnframt sagður hafa notfært sér að þannig var ástatt um stúlkuna að hún gat ekki spornað við verknaðinum vegna svefndrunga. Frekari lýsingar á meintum brotum voru afmáðar úr þeirri útgáfu ákærunnar sem fjölmiðlum barst frá embætti héraðssaksóknara.
Mun fleiri tilkynningar en er varða þessi meintu brot Hannesar gegn einu barni bárust lögreglu við rannsókn málsins. Niðurstaðan var sú að þrjú mál voru send áfram frá lögreglu til héraðssaksóknara en embættið ákvað að ákæra aðeins í einu máli.
Sex af ákvörðunum sem varða niðurfellingu rannsóknar eða ákvörðunar um að ákæra ekki voru kærðar til ríkissaksóknara. Niðurstaða ríkissaksóknara var að fella ákvarðanirnar úr gildi í þremur tilvikum og hefur ríkissaksóknari fyrirskipað lögreglu að rannsaka þessi þrjú mál aftur.
Það er því mögulegt að Hannes Valle verði ákærður fyrir fleiri kynferðisbrot síðar. Sem fyrr segir þarf hann að svara til saka í þessu máli þann 28. apríl næstkomandi.
