Helgi Áss Grétarsson, varaborgarfulltrúi Sjálfstæðisflokksins, segir að einkalíf stjórnmálamanna komi almenningi ekki við en ef fjölmiðlar greini frá því sé lágmark að hafa staðreyndirnar réttar.

Þetta kemur fram í aðsendri grein á Vísir.is. Helgi minnir þar á að við getnað og fæðingu barnsins hafi barnsfaðir Ásthildar Lóu Þórsdóttur verið fullorðinn í skilningi laganna, 16 og 17 ára. Það sé lágkúra að segja að hún hafi eignast barn með barni.

„Þetta er hér tekið fram vegna ítrekaðra rangfærslna sem settar voru fram í sjónvarpsfréttum RÚV sl. fimmtudagskvöld um málefni fráfarandi mennta- og barnamálaráðherra, Ásthildar Lóu Þórsdóttur. Auðvelt var að koma í veg fyrir þessa villandi upplýsingagjöf með því að skoða æviágrip ráðherrans á alþingisvefnum og fletta upp í Íslendingabók ásamt því að rýna í gömul lagasöfn.

Við hvað er átt?

Það er staðreynd að á 9. áratug 20. aldar urðu einstaklingar sjálfráða 16 ára og svokallaður samræðisaldur var þá 14 ára. Lagareglur um þetta efni höfðu verið lengi í gildi.

Í júní 1990 fæddi Ásthildur Lóa, þá 23 ára, barn. Á þeim tímapunkti var barnsfaðirinn hér um bil 17 ára. Hvorki við getnað né við fæðingu var faðirinn barn í skilningi þágildandi laga. Þess fyrir utan var algengt á þessum árum að Íslendingar eignuðust börn sín ungir.

Að segja að Ásthildur Lóa hafi eignast „barn með barni“ er lágkúruleg orðræða.“

Siðferði stjórnmálanna

Helgi segir fátt standa eftir að fréttaflutningi RÚV af málinu, en þó það að viðbrögð Ásthildar er hún frétti af því hafi ekki verið rétt. Þau réttlæti hugsanlega afsögn hennar.

Helgi segir slæmt ef siðferði stjórnmálanna þróist í þá átt hér á landi að menn sjái sér hag í einkalífi pólitískra andstæðinga sinna.  „Slæmt væri fyrir íslensk stjórnmál ef það væri fremur regla en undantekning,“ segir hann.

Greinina má lesa hér.