Rússland hefur þörf fyrir tekjur af olíu- og bensínsölu til að geta fjármagnað stríðsreksturinn í Úkraínu. En Rússar standa frammi fyrir þeim vanda að olíuframleiðendurnir eiga í erfiðleikum með að takast á við refsiaðgerðir Vesturlanda, árásir Úkraínumanna á olíuhreinsistöðvar og þeirra eigið getuleysi við að nútímavæða olíuhreinsistöðvarnar.

Bandaríska hugveitan Institute for the Study of War (ISW) segir í stöðuuppfærslu um gang stríðsins í Úkraínu að vegna stöðunnar standi rússneski ríkissjóðurinn frammi fyrir mikilli ógn og það sama eigi við um orkubirgðir landsins.

ISW segir að staðan gangi þvert gegn því sem Rússar haldi fram: að landið geti staðist efnahagsþvinganir Vesturlanda og geti fjármagnað stríðsreksturinn til langs tíma.

ISW byggir niðurstöðu sína á grein rússneska miðilsins Kommersant þar sem fram kemur að Rússland „sé á barmi bensínkrísu“ og að heildsöluverð á bensíni sé í sögulegu hámarki.