„Sendiráðið hér er að skoða möguleika á að opna á beint flug,“ segir He Rulong, sendiherra Kína á Íslandi, í viðtali í ViðskiptaMogganum í dag.

Kínverskum ferðamönnum sem heimsækja Ísland heim hefur fjölgað mikið á undanförnum árum og segir Rulong í viðtalinu að fjöldi umsækjenda um vegabréf til Íslands hafi þegar farið fram úr fjöldanum árið 2019 sem þá var metár.

Þetta er ekki í fyrsta sinn sem rætt um beint flug á milli Íslands og Kína en til stóð að hefja flug milli landanna vorið 2020. Vegna heimsfaraldurs kórónuveirunnar varð ekkert af þeim áformum.

Markaðurinn virðist sannarlega vera til staðar en árið 2019 heimsóttu 139 þúsund kínverskir ferðamenn Ísland, eða 380 á degi hverjum að meðaltali.

Rulon segir við ViðskiptaMoggann að vandamálið núna sé það hvað íslenska sendiráðið í Peking er fáliðað við að afgreiða umsækjendur um vegabréf til Íslands.

„Ísland hefur bætt við starfsfólki í sendiráðið ytra en samt dugir það ekki til. Svo að ég tel að það sé mikið svigrúm til að fjölga ferðamönnum frá Kína á Íslandi,“ segir hann í viðtalinu.

Rulon bætir við að hann hafi verið í Kína í september og rætt við yfirmann flugmála í Kína, Song Zhiyong, og fengið fullvissu um að hann myndi styðja heilshugar samkomulag við Ísland um beint flug.

En á þessari stundu er vandamálið ekki tengt stjórnvöldum enda eru í gildi tíu flugréttindi milli landanna. Slíkt flug ætti að bera sig á viðskiptalegum forsendum. Við vonumst því til að sjá fleiri Kínverja fá vegabréfsáritun til að koma til Íslands svo að þeir geti fyllt vélarnar þegar opnað verður fyrir flugið, enda munu flugfélögin þurfa að gera fýsileikakönnun. Við vonum að það verði senn að veruleika,“ segir hann.

Rulong ræddi þetta sama mál við RÚV í lok júlí í fyrrasumar og sagði þá að raunhæft væri að hefja beint flug á milli landanna innan næstu fimm ára.